Kanker: Moenie rook nie!
2012-02-04 08:46
Pretoria – Om te rook, kom neer op ’n doodswens.
Dit is die grootste oorsaak van kanker, het dr. Carl Albrecht, navorsingshoof van die Kankervereniging van Suid-Afrika (Kansa), Vrydag op die vooraand van Wêreldkankerdag gesê.
“Rook is een van die grootste flaters van die mensdom oor die afgelope paar honderd jaar.”
Vanjaar het Wêreldkankerdag as tema die moontlikheid om die sterftes aan kanker en ander nie-oordraagbare siektes wêreldwyd teen 2025 met 25% te verminder. Kanker is tans die voorste oorsaak van sterftes wêreldwyd.
Die Wêreldgesondheidsorganisasie (WGO) raam die aantal sterftes weens kanker sal tussen 2008 en 2030 met 57% toeneem.
Die grootste wanpersepsie oor kanker is volgens Albrecht: “Iemand anders gaan dit kry, nie ek nie.”
Sowat ’n kwart van Suid-Afrikaners sal in hul leeftyd kanker kry.
“Die probleem is dat daar geen toets is om vas te stel wie dit gaan kry nie,” het Albrecht gesê.
“Almal moet leef asof hulle kankerkandidate is en ons moet aktief die risiko’s verminder.”
Kansa het verlede jaar op Wêreldkankerdag onderneem om handtekeninge in te samel om ’n kankervrye gemeenskap daar te stel.
Volgens Sue Janse van Rensburg, uitvoerende hoofbeampte van Kansa, is 33 000 handtekeninge al ingesamel.
Albrecht het ook teen alternatiewe behandeling gewaarsku.
“Behandeling sonder ’n wetenskap-basis kan gevaarlik, bedrieglik en ondoeltreffend wees. As dit regtig werk, sou dit deur wetenskap ondersteun word.”
Behandeling is tans ’n kombinasie van chirurgie, chemoterapie en radioterapie.
– Volg Nuus24 op Twitter
- Beeld