Kaapstad kry klimaatverandering-observatorium
2011-12-09 12:09
Kaapstad – Kaapstad gaan teen 2014 die eerste klimaatverandering-observatorium in die wêreld kry, het ‘n berig Vrydag gesê.
Die observatorium sal komplekse inligting oor internasionale klimaatverandering in ‘n relevante, toeganklike en verstaanbare wyse weergee, het die SABC berig.
Dit sal op ‘n loopgang by die V&A Waterfront deur die Polar Foundation gebou word.
Dié stigting leer mense oor die wetenskap van die pole en navorsing wat daar gedoen word.
Kaapstad is gekies omdat dit so naby aan die Suidpool geleë is.
Die stigting se adjunk-president, Nighat Amin, het aan die uitsaaier gesê dat Kapenaars hul ondersteuning vir die projek gebied het.
“Daar is ‘n gewilligheid hier om iets oor dit (klimaatverandering) te doen,” het sy gesê.
“In ander dele van die wêreld was daar gevestigde belange, maar ons het gevind dat mense in Suid-Afrika betrokke wil raak.”
Prins Albert II van Monaco is die beskermheer van die projek. Hy en sy Suid-Afrikaanse vrou, Charlene, was in die land vir die COP17-klimaatberaad.
– Volg Nuus24 op Twitter
- SAPA