Jongmense verkies selfbeeld bo seks, geld
2011-01-12 10:24
New York – ‘n Gesonde selfbeeld is waarna jongmense die meeste hunker, nie seks of geld nie.
Navorsers van die Ohio State-universiteit en Brookhaven National Laboratory in Upton, New York, het bevind studente verkies komplimente en goeie toetspunte bo ander hoog geagte aktiwiteite soos seks, kuier saam met vriende en ‘n salaris in die hand.
Brad Bushman, ‘n professor van sielkunde aan dié Ohio universiteit reken hierdie bevinding behoort die gevaarligte van die samelewing te laat flikker.
“Mense soek dikwels ‘n vinnige oplossing vir ingewikkelde probleme,” verduidelik hy. “Van tienerswangerskap tot geweld; ons dink as ons beter voel oor onsself sal dié dinge nie gebeur nie.”
Bushman meen die bevindinge, wat in die aanlynpublikasie Journal of Personality verskyn, laat dit blyk asof talle jongmense ‘n bietjie te veel op die verryking van hul selfbeeld fokus.
“Dit sou nie akkuraat wees om te se hulle is verslaaf aan selfbeeld nie, maar hulle was nader aan verslawing daaraan as aan enige van die ander aktiwiteite wat ons bestudeer het.”
Studente moes ‘n lys aktiwiteite klassifiseer volgens hoe baie hulle daarvan hou teenoor hoe graag hulle dit sal wil hê.
Resultate het wel getoon dat respondente meer van plesieraktiwiteite hou as wat hulle dit wil hê, maar die verskil tussen “hou van” en “wil hê” was die kleinste waar selfbeeld betrokke was.
Bushman glo fyn onderskeid word gemaak tussen selfbeeld en selfliefde. Oordrewe selfbeeld word selfliefde, reken hy.Volg Nuus24 op Twitter.
- Reuters