Jong kinders loop groot gevare op internet
2011-03-03 14:23
Londen – Byna driekwart van kinders onder die ouderdom van vyf gebruik die internet op ‘n daaglikse basis, het ‘n skokkende studie getoon.
Sowat 73% van voorskoolse kinders word daagliks na die internet gelok deur webwerwe soos die BBC se Cbeebies en speletjies soos Peppa Pig, het navorsing getoon.
Die studie, wat deur Plymouth Council uitgevoer is, het die internet-gewoontes van 423 kinders onder die ouderdom van vyf bestudeer.
Daar is gevind dat 305 van hulle die internet elke dag gebruik.
Baie ouers laat ook hulle kinders toe om sonder toesig op die internet rond te speel, wat hulle oop teikens vir pedofiele maak.
Kenners in kinderveiligheid het met skok gereageer en die aandag gefokus op die gevare wat jong internet-gebruikers in die gesig staar.
Kommer is ook uitgespreek dat jongmense wat so baie tyd op die internet deurbring kan sukkel met leerprosesse.
Daar word gevrees dat hulle lees- en skryfvaardighede nie goed sal ontwikkel as hulle so baie tyd voor die rekenaar deurbring nie.
Verder kan die skerp lig van die rekenaarskerm die ontwikkeling van die brein in jong kinders beskadig.
Prof. Tanya Byron, ‘n kliniese sielkundige, het gesê as jy jou kind sonder toesig op die internet los is dit soos om jou kind “vir n paar uur alleen in ‘n winkelsentrum te los.”
“Ouers besef nie dat hulle ‘n verantwoordelikheid het om kinders vir die aanlyn-wêreld, net soos vir die regte wêreld, voor te berei nie,” het sy gesê.
“Baie ouers het nie met die internet grootgeword nie en ken nie die gevare daarvan nie.”
- Daily Mail
Volg Nuus24 op Twitter