Joernaliste krap kop oor nuwe PlayStation 4
2013-02-21 09:57
New York – Sony het Woensdag die nuwe PlayStation 4 bekend gestel en sy visie vir die “toekoms van videospeletjies” met joernaliste gedeel.
Andrew House, hoof- uitvoerende beampte van Sony Computer Entertainment, het tydens die bekendstelling in New York gesê die maatskappy se doel met dié nuwe konsole is om die PS4 te vestig as ‘n “toonaangewende plek om videospeletjies te speel".
House het egter nie enige besonderhede gegee oor die maatskappy se planne vir rolprent-, musiek-, televisie- en ander digitale inhoud op die PS4 nie. Sony het ook nie 'n prototipe van die PS4 by die bekendstelling vertoon nie.
“Dit was nogal vreemd dat Sony nie die toestel gewys het nie,” het Brian Blau, direkteur van die navorsingsfirma Gartner, gesê.
“Hulle wil dit seker nie alles weggee nie, wat die natuur van die bedryf is,” het Blau bygevoeg.
Die PS4 is ontwerp om sy speler te leer ken, tot só ‘n mate dat die toestel later sal kan voorspel watter videospeletjies die gebruiker sal wil koop en dit dan vooraf sal installeer.
Sony het ook sy voorneme bekend gemaak om die wêreld se grootste netwerk vir videospeletjies te bou.
“Deur die PS4, die PlayStation Netwerk en ander sosiale platforms te kombineer, streef ons daarna om die eerste sosiale netwerk te skep wat heeltemal aan videospeletjies toegewy is,” het David Perry, hoof van die Gakia-videospeletjiemaatskappy, tydens die bekendstelling gesê. Sony het Gakia verlede jaar gekoop.
Perry het onder andere genoem dat mense PlayStation-videospeletjies op die internet sal kan speel deur hul PS4, tabletrekenaars of die PlayStation Vita te gebruik.
“Oor die lang termyn wil ons PlayStation-tegnologie op alle toestelle beskikbaar hê.”
Sony het gesê die PS4 sal voor die einde van die jaar beskikbaar wees, maar het nie spesifieke besonderhede gegee nie. Geen besonderhede is in dié stadium beskikbaar oor wanneer die toestel in Suid-Afrika te koop sal wees nie.
Ouer PS3-speletjies sal op die nuwe toestel gespeel kan word, het Blau bygevoeg.
– Volg Nuus24 op Twitter
- AFP
