Jagter skiet luiperd op hom
2010-11-15 10:00
Beeld
Johannesburg - ’n Beroepsjagter van Bela-Bela (Warmbad) het ’n verwoede, gekweste luiperdmannetjie in Tanzanië doodgeskiet terwyl die dier hom vasgepen het.
“Ek het nooit regtig die luiperd gesien nie,” het Jaco Oosthuizen, 37, stigter van Game Trackers Africa, gesê. “Ek het bloot op gevoel en gehoor gereageer, omgeswaai en geskiet toe die luiperd my aan die regterarm beetkry.”
Volgens Oosthuizen was die luiperd, wat in lang gras langs ’n droë rivierloop geskuil het, sowat ses tree regs van hom toe die dier hom bespring het.
Die dier het die spiere in Oosthuizen se regter bo-arm afgeruk.
Oosthuizen, wat links is, het ’n skoot afgevuur voordat die luiperd hom teen die bors vasgepen het. “Ek het hierna gevoel in my regterarm verloor.
“Dit was my tweede skoot uit my dubbelloopgeweer wat die luiperd getref het terwyl hy bo-op my was,” het Oosthuizen oor sy noue ontkoming op 4 November vertel.
Die luiperd is meer as ’n uur tevore deur ’n Mexikaanse jagter, een van Oosthuizen se gereelde kliënte, in die Selous- reservaat gekwes toe hy die dier as trofee wou skiet. Nadat die luiperd gewond is, het die dier gevlug.
Spoorsnyers is per radio ontbied om die gekweste dier te help opspoor.
Volgens Oosthuizen het hulle langer as ’n uur gewag om die “gevaarrisiko” te verminder en die luiperd tyd te gee om “af te koel” omdat die beseerde dier omgekrap sou wees. Teen dié tyd was dit reeds donker.
Omdat Oosthuizen en sy spoorsnyers toe sowat twee uur van hul kamp was, is sy wonde eers die volgende oggend onder lokale verdowing in die naaste dorpie ontsmet en behandel.
Hy het na Dar es Salaam gevlieg waar hy steke gekry het, maar die dokter kon niks doen om sy spiere te heg nie.
Twee dae later is Oosthuizen met ’n kommersiële vlug na Johannesburg.
Hy is na die Pretoria-Oos-hospitaal gebring waar sy spiere in twee operasies geheg is. Oosthuizen is verlede week uit die hospitaal ontslaan.
Sy arm is steeds in gips.
Volgens Oosthuizen is die dooie luiperdmannetjie met die hulp van nog ’n beroepsjagter opgespoor. “Volgens een van my spoorsnyers was die luiperdmannetjie baie oud as daar na die grootte van sy skedel gekyk word.”
Oosthuizen neem sy kliënte van 1999 na dié reservaat en die Moyowosi-reservaat in Tanzanië. Dit is die eerste keer dat hy tydens só ’n jagtog beseer is.
Volg Nuus24 op Twitter
- Beeld