Kyk: Jagluiperdwelpies word gebore

2012-05-02 19:49

Johannesburg – Die geboorte van jagluiperdwelpies by ‘n sentrum in Limpopo is Woensdag vir die eerste keer via ‘n webkamera op die internet uitgesaai.

“Ons hoop om die geboorte van die welpies vas te vang sodat kykers vir die eerste keer ooit kan sien hoe hierdie bedreigde diere gebore word,” het Paul Penzhorn, woordvoerder van Africam.com, gesê.

“Ons sal hulle [die welpies] dan deur hul verskillende fases by die sentrum volg, totdat hulle hopelik weer in die natuur vrygelaat kan word,” het hy gesê.

Africam.com het reeds kameras by watergate in reservate in ander dele van die land.

Die kamera is by ‘n omheinde deel van die Hoedspruit-sentrum vir bedreigde spesies in Limpopo geplaas en het Woensdagmiddag begin afneem.

“Ons hoop om tienduisende [kykers] te kry.”

Die regstreekse uitsending sal aanbly soos wat die welpies groei.

Die ma sal die welpies vir 12 maande grootmaak, waarna die sentrum hulle sal rehabiliteer sodat hulle in die natuur vrygelaat kan word.

– Besoek www.africam.com om die video te kyk.

– Volg Nuus24 op Twitter
 

- SAPA