Jagluiperds is aan die uitsterf
2011-12-05 07:01
Johannesburg – Sondag op ’n internasionale dag wat spesiaal aan die bewusmaking van die bewaring van jagluiperds gewy word, het 27 bewaringswetenskaplikes in Namibië gegradueer.
Hulle het hul opleiding voltooi by die Cheetah Conservation Fund (CCF) in Otjiwarongo.
Dit is hier waar dr. Laurie Marker baanbrekerswerk met die bewaring van jagluiperds doen.
Hy het Khayam, ’n jong jagluiperd, 35 jaar gelede van die VSA na dié sentrum gebring vir navorsingsdoeleindes.
Khayam is op 4 Desember gebore en daarom het Marker besluit om dié dag te gebruik om mense wêreldwyd bewus te maak van die lot van dié katte.
Naas renosters is jagluiperds tans die dier wat die vinnigste uitsterf in Afrika.
Sowat ’n eeu gelede was daar nagenoeg 100 000 jagluiperds in meer as 44 lande te sien. Vandag is daar sowat 10 000 van die diere in 23 Afrika-lande oor.
In Iran is na beraming net 70 jagluiperds. Dié syfers is die rede waarom jagluiperds nou ook op die rooilys van bedreigde diere is.
Die wetenskaplikes wat dié week gekwalifiseer het, hoop om veral boere bewus te maak daarvan dat jagluiperds aan die uitsterf is.
Faktore wat dié katte se voorbestaan bedreig, is dat hulle deur boere gesien word as “probleemdiere”, dat hul natuurlike habitat weens ontwikkelings verklein en dat hul prooi om dié rede ook verminder.
Die bewusmakingsdag rondom jagluiperds volg kort nadat Johan van der Westhuizen van Alberton gehoor het hy het een van die grootste jagluiperds nóg tydens ’n jagtog gedood.
Hy het die dier in April vanjaar tydens ’n begeleide jagtog in Khomas in Namibië geskiet, maar die rekord is eers op 7 November bevestig.
– Volg Nuus24 op Twitter
- Beeld