Iran voer nou oorlog in kuberruim
2012-10-25 08:54
Washington – Twee jaar ná die Stuxnet-virus gebruik is om die rekenaarstelsels agter Iran se kernprogram aan te val, wend dié land hom nou toenemend self tot kuberoorloë.
Hoewel die bedreiging van 'n militêre aanval op sy kernprogram deur Israel deesdae nie meer so waarskynlik is nie, gaan Iran gebuk onder streng sanksies, 'n geldeenheid waarvan die waarde skerp daal, en toenemende ongelukkigheid onder sy burgers.
Onder dié omstandighede, en terwyl lande bang is om direkte aksie te neem, wil dit voorkom of Iran hom toenemend toespits op kuberaanvalle – die soort aanvalle wat stilweg uitgevoer kan word, net om later ontken te word.
Dis teen dié agtergrond dat 'n toenemende aantal regeringsamptenare en sekerheidskenners sê bewyse dui daarop dat Iran veral in die afgelope jaar meer op kuberaksies fokus.
Onder die ernstigste aanvalle in die afgelope maande tel kuberaanvalle op Amerikaanse banke soos Citigroup en Bank of America, sowel as 'n kuberaanval op die Saoediese oliemaatskappy Aramco, wat gelei het tot die vernietiging van 30 000 rekenaars.
"Ons weet al lank dat Iran aan hierdie soort tegnieke werk, maar dis verrassend hoe vinnig hulle vooruitgang gemaak het," het James Lewis, 'n kuberruims-spesialis by die Washington D.C. Centre for Strategic and International Studies, gesê.
"Nie een van die rolspelers wil 'n oorlog hê nie, veral oor die ekonomiese koste daaraan verbonde. So dit is wat hulle doen."
Dina Esfandiary, 'n navorser by die International Institute for Strategic Studies in Londen, meen heelwat konfrontasies sal in die toekoms oor die internet plaasvind.
"Die kuberruim is waarheen die grootste deel van die konfrontasie sal skuif," het sy gesê. "Dit is vir Tehran die veiligste vorm van konfrontasie omdat dit so geheimsinnig is, en ontken kan word."
– Volg Nuus24 op Twitter.
- Reuters
