Internetverslaafdes se dae getel
2010-03-16 15:20
Seoel - Suid-Korea bied van 2011 af gratis sagteware aan om die tyd wat internet- en speletjieverslaafdes op die internet deurbring, te verminder, het die premier se kantoor Dinsdag gesê.
Die regering, wat sowat twee miljoen webverslaafdes het, gaan twee tipes sagteware beskikbaar stel.
Die een is die Consensual Shutdown en die ander een word Internet Fatigue genoem.
Consensual Shutdown beperk die gebruik van die rekenaar deur die tyd wat deur 'n voog of die gebruiker gestel is. Internet Fatigue maak speletjies moeiliker sodat die speler verveeld word.
Die aanbod is deel van 'n plan wat deur die ministerie van openbare administrasie en sekuriteit opgestel is om internetverslawing te bekamp.
"Die onlangse voorval waar 'n speletjieverslaafde gesterf het, wys duidelik dat internetverslawing 'n probleem is vir alle ouderdomme," het 'n woordvoerder van die ministerie gesê.
Die polisie het vandeesmaand 'n paartjie in hegtenis geneem wie se babadogter van honger gesterf het terwyl hulle by 'n internetkafee was.
Die nuwe plan bied opvoeding en berading. Die regering sê 8,8% van die internetgebruikers is verslaafdes en hoop om dié getal teen 2012 tot 5% te verminder.
– Sapa-AP