Internetgebruik in SA neem toe
2010-01-14 10:24
Johannesburg - Meer as 5 miljoen mense in Suid-Afrika gebruik nou al die internet, het navorsing deur die maatskappy World Wide Worx getoon.
Dié navorsing het bevind dat die aantal internetgebruikers van 4,6 miljoen in 2008 tot 5,3 miljoen in 2009 gestyg het.
“Die goeie nuus is dat ons sal voortgaan om sterk groei in 2010 te sien en dat ons die 6 miljoen merk teen die einde van die jaar behoort te haal,” het Arthur Goldstuck, besturende direkteur van World Wide Worx, gesê.
“Die volgehoue groei in internet-penetrasie is ‘n sleutelfaktor wat die ekonomie in Suid-Afrika positief sal beïnvloed,” het Reshaad Sha, senior bestuurder van die Cisco-groep, in ‘n verklaring gesê.
“Die verskillende sosiale netwerke wat deur die plaaslike mark gebruik word, het definitief ook internet-groei aangevuur.”
Volgens statistiek wat deur Internet World Stats bekend gemaak is, is internet-penetrasie in Afrika 6.8 %. Penetrasie in Europa is 52% en 74% in die VSA.
- Sapa