Internet-reuse span saam om Egipte te help
2011-02-01 09:42
Egipte – Google Inc het ‘n spesiale diens geskep om mense in Egipte toegang te gee om Twitter-boodskappe te stuur deur ‘n nommer te skakel en ‘n boodskap te los.
Dit volg nadat die internet-toegang in die land afgesny is te midde grootskaalse betogings teen die regering.
“Soos baie mense sit ons vasgenael voor die nuus van wat in Egipte aan die gebeur is en ons het gedink oor wat ons kan doen om die mense op die grond te help,” het ‘n inskrywing op Google se amptelike blog Maandag gelees.
Die diens, wat volgens Google saam met ingenieurs van Twitter ontwikkel is, laat mense toe om ‘n telefoonnommer te skakel en ‘n boodskap te los.
Die stemboodskap word dan outomaties verander in ‘n boodskap wat op Twitter gestuur word deur gebruik te maak van die Twitter-trefwoord #egypt, het Google gesê.
Volgens Google is geen internet-konneksie nodig om die boodskappe te stuur nie.
Die telefoonnommers wat Google gegee het vir mense om die diens te gebruik is: +16504194196 of +390662207294 of +97316199855.
YouTube het in die tussentyd beeldmateriaal van die betogings in Egipte in die kollig geplaas.
Die amptelike YouTube-blog het in ‘n inskrywing gesê dat hulle ‘n hele paar stappe gaan neem om seker te maak dat die wêreld weet wat in Kaïro , Alexandria, Suez en ander dele van die land aangaan.
Die Egiptiese regering probeer hard om alle mediadekking van die reuse-betogings wat die land teister te blokkeer, maar nietemin word die nuus steeds gedek.
YouTube trek op elke bladsy op hul webwerf aandag na die Egipte protes-video’s.
Kyk hier na die Citizentube video
Volg Nuus24 op Twitter
- Reuters