Internet neem groot taalstap
2009-10-26 13:32
Seoul, Suid-Korea - Die internet gaan een van die grootste veranderinge nog in sy bestaan van vier dekades maak met die goedkeuring van domein-name of -adresse wat binnekort in ‘n ander taal as Engels geskryf kan word.
Die Internet Corporation for Assigned Names and Numbers (ICANN), ‘n nie-winsgewende organisasie wat toesig hou oor domein-name, vergader vandeesweek in Seoel.
Een van die punte wat by dié vergadering bespreek gaan word is of ICANN gaan toelaat dat volledige internetadresse vir die eerste keer in letters anders as Latyns toegelaat gaan word.
Dié besluit kan die web se potensiaal oopmaak vir meer mense regoor die wêreld, want adresse kan dan in Arabies, Koreaans, Japanees, Grieks, Hindies en Russies geskryf word.
“Dit is die grootste tegniese verandering sedert die internet 40 jaar gelede ontdek is,” het Peter Dengate Thrush, voorsitter van ICANN se raad, gesê. Hy het dit ’n “fantastiese, gekompliseerde, tegniese onderneming” genoem.
Thrush het gesê na verwagting sal die raad Vrydag goedkeuring vir die verandering Vrydag gee.
- Sapa-AP