Internet-miljoenêr gou weer op dreef
2012-11-01 11:06
Wellington – Die omstrede baas van die webwerf Megaupload, Kim Dotcom, het Donderdag planne onthul om sy internet-sakeryk in Januarie weer op die been te kry op die herdenking van sy inhegtenisneming in Nieu-Seeland.
Dotcom, wat deur owerhede geteiken is weens sy webwerf, wat onder andere as stoor- en aflaaiplek vir onwettige data, rolprente en musiek gedien het, is vry op borgtog, maar veg steeds om nie aan die VSA uitgelewer te word nie.
Die Nieu-Seelandse polisie het hom op 20 Januarie 2011 by sy herehuis buite Auckland in hegtenis geneem as deel van 'n Amerikaanse ondersoek na beweerde kopieregoortredings. Sy webwerf, Megaupload, is deur owerhede gesluit.
Die 38-jarige Duitser het op Twitter sy planne aangekondig om 'n nuwe diens, genaamd Mega, te begin. 'n Publisiteitswebwerf vir die diens het glo miljoene besoekers in enkele ure gelok.
"Een ding is seker: Die wêreld soek MEGA!," het hy op Twitter geskryf.
Meer besonderhede oor die beplande webwerf is nie bekend gemaak nie, maar die bemarkingswebwerf het gesê die nuwe diens sal gevorderde tegnologie gebruik om data te beskerm sodat slegs gebruikers, en nie die webwerf se operateurs nie, kan weet wat hulle oplaai.
Dit sal owerhede teoreties verhoed om te beweer dat die webwerf se operateurs mense willens en wetens help om die wet te breek deur onwettige sagteware en ander data op die stelsel te laai.
Die oorspronklike Megaupload-webwerf het in 'n stadium sowat 4% van die wêreld se internetverkeer gelok, met 50 miljoen besoeke per dag.
– Volg Nuus24 op Twitter.
- AFP
