Intel teiken slimfoonmark
2013-01-08 09:11
Las Vegas – Intel het Maadag gesê hy sal sy betrokkenheid by die vervaardiging van mikroskyfies vir slimfone en ander mobiele toestelle verhoog deur veral ontluikende markte en die goedkoper segment van die mark te teiken.
Intel het sy plan by vanjaar se Consumer Electronics Show (CES), die wêreld se grootste byeenkoms vir die tegnologiebedryf, bekend gemaak, en beklemtoon dat hy van plan is om 'n groter markaandeel in die mobiele mark na te streef.
Intel het gesê hy beplan 'n "nuwe slimfoon-platform vir ontluikende markte". Dié sektor is een van die mark se grootste groeipunte.
"Die beste van Intel kom na 'n mobiele toestel naby jou," het die maatskappy se Kirk Skaugen gesê.
"Ons is op die punt om die grootste verbetering in battery-doeltreffendheid in Intel se geskiedenis te bied... terwyl ons nuwe, breër menslike koppelvlakke bied vir toestelle deur aanraking, steminstruksies, gesigsherkenning en gebaar-gebaseerde interaksies.
Intel is die wêreld se grootste vervaardiger van mikroskyfies, maar het die afgelope paar jaar gesukkel om die oorskakeling na mobiele toestelle te maak.
– Volg Nuus24 op Twitter.
- AFP
