Indonesië: 33 seeskilpaaie van stropers gered

2012-12-10 12:42

Denpasar – Die mariene polisie in Bali het op 33 bedreigde seeskilpaaie beslag gelê wat stropers glo aan restaurante wou verkoop, het amptenare Maandag gesê.

Die taakmag het die lewende skilpaaie Sondag op ‘n boot by die Tanjung Benoa-hawe gevind, het ‘n polisiewoordvoerder gesê.

“Ons is nog op soek na die smokkelaars,” het die woordvoerder gesê.

Die skilpaaie weeg tussen 30 en 60 kg en is tussen $518 (sowat R4 500) en $725 (sowat R6 200) werd.

“Van die skilpaaie is siek as gevolg van ontwatering,” het die woordvoerder bygevoeg.

Party restaurante in Bali verkoop onwettig skilpadvleis. Seeskilpaaie word ook gereeld geoffer tydens tradisionele Hindoe-seremonies.
 
– Volg Nuus24 op Twitter

- Sapa-DPA