Indië: Vrou vas oor Facebook-inskrywing ná politikus se dood

2012-11-19 09:40

Moembaai – Die polisie in Indië het Maandag ‘n vrou in hegtenis geneem vir 'n negatiewe Facebook-inskrywing wat sy gemaak het ná Moembaai tot stilstand gekom het na die dood van die politikus Bal Thackeray.

‘n Vriendin van die vrou is ook in hegtenis geneem ná sy die Like-opsie by die inskrywing gekies het.

Shrikant Pingle, ‘n polisiebeampte, sê die twee sal later Maandag in die hof verskyn.

“Hulle is aangekla van die verontagsaming van godsdienstige sentiment,” het Pingle gesê.

Thackeray se dood het Moembaai tot stilstand gebring, met ondernemings wat gesluit het en taxi's wat paaie vermy het uit vrees vir geweld.

Thackeray is die stigter van die Shiv Sena, 'n regse Hindoe-nasionalistiese beweging. Hy het in 'n stadium skerp kritiek ontlok toe hy gesê het hy bewonder Adolf Hitler.

Die 21-jarige vrou het glo op Facebook geskryf dat mense elke dag sterf en dat Thackeray se dood nie beteken die stad moet tot stilstand kom nie.

– Volg Nuus24 op Twitter
 

- Sapa - AFP