Horlosie dalk op pad vir Apple?

2013-02-12 14:39

Londen – Apple beplan glo om 'n reeks polshorlosies bekend te stel wat deur die maatskappy se iOS-bedryfstelsel aangedryf word, berig al hoe meer mediabronne.

Die toestelle sal volgens die New York Times van geboë glas gemaak word. Dit sal ook met Apple se iOS-bedryfstelsel, wat op die iPhone, iPad en iPod gebruik word, spog.

Richard Nunn, ‘n digitale media-analis by Charles Stanley, het gesê dat die gerugte nie as ‘n verrassing kom nie.

“Dit pas nogal mooi in by Apple. Hulle soek nuwe toestelle wat wêreldwyd aan massas verkoop kan word,” het Nunn aan Sky News gesê.

“’n Sogenaamde iWatch sal nie te veel verskil van Apple se kerntegnologie nie.”

“Dit sal ‘n GPS-navigasiestelsel hê, musiek, betaalfunksies – alles wat Apple al reeds ontwikkel het.”

Apple het geweier om kommentaar te lewer op die gerugte.

– Lees hier meer.

– Volg Nuus24 op Twitter
 

- AFP