Hongersnood is wêreld se voorland indien bye uitsterf
2011-03-12 07:30
Die ineenstorting van bykolonies in verskeie wêrelddele – veral weens lugbesoedeling – hou rampspoedige gevolge in vir die produksie van kos vir ’n wêreldbevolking wat al raak aan 7 miljard.
Die Wêreldomgewingsprogram (Unep) het gister in ’n verklaring gesê mense sal hul leefwyse drasties moet aanpas om te sorg dat bye – die stuifmeeldraende insekte wat die groei en vermeerdering van plante verseker – nie uitsterf nie.
Mnr. Achim Steiner, Unep se uitvoerende direkteur, het gesê bye is ’n natuurlike bate wat deur die mens mishandel word, veral weens die oormatige gebruik van insek- en onkruiddoders en ander vorms van lugbesoedeling.
Hy het daarop gewys dat van die sowat 100 gewasse wat 90% van die wêreld se kos uitmaak, 70% deur bye bestuif word. As bye sou uitsterf, sal dit die
wêreld in hongersnood dompel.
Luidens ’n verslag, Global Bee Colony Disorders and Other Threats to Insect Pollinators, wat gister deur Unep uitgereik is, is daar verskeie faktore wat die voortbestaan van bye negatief raak. Dit strek van die vermindering in blomplante (habitatvernietiging) tot insekdoders, asook die verspreiding van plae en lugbesoedeling.
Wetenskaplikes wat die verslag opgestel het, pleit onder meer by boere om weer blomplante langs hul oorde, mielie- en koringlande te plant sodat dit bye kan teruglok.
Hulle vra mense ook om met oorleg en eerder omgewingsvriendelike insek- en onkruiddoders te gebruik.
“Die mens het die illusie versin dat die tegnologiese vooruitgang wat hy in die 21 ste eeu gemaak het, hom onafhanklik kan maak van die natuur.
“Bye beklemtoon die werklikheid dat ons méér (en nie minder nie) afhanklik raak van die dienste wat die natuur aan ons lewer,” het Steiner gesê.
- Volg Nuus24 op Twitter.