Homeopatie ál meer erken
2010-06-24 14:16
Gauteng - Wil jy graag ’n alternatiewe geneser gaan spreek, maar jy is nie seker waar om te begin nie? Carla Lewis-Balden gee raad.
Natuurlike geneeskunde is in die verlede as oëverblindery en kwaksalwery afgemaak en baie dokters en wetenskaplikes voel steeds daar is te min wetenskaplike bewyse om dit ernstig op te neem.
Dr. Louis Mullinder, registrateur van die Raad vir Verwante Gesondheidsberoepe (RVGSA), sê egter baie dokters en pasiënte begin toenemend die rol van komplementêre medisyne in die gesondheidswêreld erken.
Die Suid-Afrikaanse Fakulteit vir Homeopatie, ’n geregistreerde private instituut van hoër onderwys, bied ook aanvullende kursusse vir gekwalifiseerde dokters aan.
Hoe dit ook al sy, ál meer mense raadpleeg natuurlike en komplementêre geneeskundiges met hul kwale, volgens ’n studie wat deur die Mediese Universiteit van Suid-Afrika (Medunsa) gedoen is.
Volgens dié studie het die meeste van die respondente gevoel hulle word in ’n konsultasie met ’n dokter aangejaag en hulle kry nie genoeg persoonlike aandag nie.
Nog klagtes was dat dokters opgetree het asof hulle alles weet en die pasiënte nie genoeg inligting gegee het oor hul siekte of toestand nie.
Baie was ontevrede dat hulle soms net met ’n voorskrif uitgestuur is, sonder enige ander aanvullende inligting oor hul siekte of toestand.
Volgens die respondente was die homeopate meer geïnteresseerd in hul kwale en het hulle op ’n empatiese manier behandel.
Die konsultasie self is as terapeuties beskou, met die respondente wat die woord “holisties” gebruik om ’n homeopatiese konsultasie te beskryf.
“Homeopatie kyk na mense op verskillende vlakke, van die fisieke tot die spirituele, van die emosionele tot die sielkundige tot die sosiale,” meen een van die respondente wat aan dié studie deelgeneem het.
Volgens die respondente het die homeopate ook ’n noukeurige geskiedenis van hul pasiënt se gesondheid gevra.
“Só kry hulle die konteks van jou gesondheid voordat hulle sommer net blindelings ’n diagnose maak,” het een respondent gesê.
- Beeld