Hof beslis oor lasterlike Facebook-inskrywing
2013-02-04 10:59
Pretoria – 'n Johannesburgse man het 'n hofsaak gewen teen 'n voormalige vriendin wat lasterlike aanmerkings oor hom op haar Facebook-blad gepubliseer het.
Regter Nigel Willis se beslissing verlede week baan die weg vir gebruikers om in die toekoms skadevergoedingseise in te stel wanneer lasterlike uitlatings oor hulle op dié sosiale netwerk gemaak word, het die Saturday Star berig.
Die klaer is nie deur die koerant geïdentifiseer nie.
Die vrou het verlede jaar oor die man op haar Facebook-blad geskryf: “Ek wonder ook wat gebeur het met die persoon wat ek 15 jaar lank as 'n beste vriend gesien het, en hoe dié gedrag geregverdig word.
“Onthou, ek sien elke dag die hartseer gesigte van jou meisies.
“Moet ons die alkohol, die dwelms of die kerk blameer, of is dit net nóg redes om nie verantwoordelikheid vir jou eie gedrag te neem nie? Maar meestal wonder ek of jy, wanneer jy in jou dronk testosteroon-waas voor die spieël staan, steeds 'n man sien?”
Die man, 'n versekeringsmakelaar wat van sy vrou vervreem is, het die hof gevra om die vrou te beveel om dié kommentaar te verwyder, en om haar te verbied om soortgelyke stellings te maak.
Sy vervreemde vrou woon nou by dié vriendin.
Hy het die vriendin as vriend op Facebook verwyder toe sy vrou hom verlaat het en by die vriendin gaan woon het.
Die regter het in sy uitspraak gesê die vrou se kommentaar was nie in die openbare belang nie.
“Sy is nie in staat om haar kommentaar te regverdig nie. Die agtergrond van die kommentaar, tesame met die woorde self, wys dat die respondent kwaadwillig opgetree het toe sy die kommentaar gepos het,” het die regter gesê. Hy het bygevoeg dat die man 'n reg het tot privaatheid, en dat sy reputasie beskerm moet word.
– Lees hier meer.
– Volg Nuus24 op Twitter.
- News 24
