Hou jou LinkedIn-profiel só veilig

2012-06-13 11:10

Kaapstad – Die veiligheid van gebruikers se besonderhede op sosiale netwerke is weer in die kollig ná kuberkrakers toegang tot ongeveer ses miljoen gebruikers van die sosiale netwerk LinkedIn se rekeninge gekry en hul wagwoorde gesteel het.

Terwyl die maatskappy ondersoek instel na die voorval het Habari Media, LinkedIn se amptelike verteenwoordigers in Suid-Afrika, gebruikers gemaan om die nodige voorsorg te tref om nie slagoffers van kuberkrakers te word nie.

Wayne Bischoff, besturende direkteur van Habari Media, het volgens The Media Online gesê Suid-Afrika het ongeveer 1.8 miljoen LinkedIn-gebruikers.

Hy het gesê een van die maniere om jou privaatheid op dié sosiale netwerk te beskerm is om 'n sterk wagwoord te hê wat minstens eenkeer elke paar maande verander word.

Volgens Bischoff moet dieselfde wagwoord ook nie vir ander webwerwe gebruik word nie. Verder is dit ook belangrik dat jy jou wagwoord nie aan ander mense uitgee of dit iewers neerskryf nie.

Gebruikers moet volgens Bischoff onthou om altyd uit te teken wanneer 'n webwerf klaar besoek is, en moet nie persoonlike besonderhede soos e-posadresse, huisadresse of telefoonnommers op hule profiele plaas nie.

– Volg Nuus24 op Twitter.