Hidrobreking ook in Mpumalanga beplan
2011-10-25 08:06
Daar word nou beplan om gas deur hidrobreking ook te ontgin op 27 saai- en veeplase in Mpumalanga, in die opvangsgebied van die Vaalrivier.
Leon van Tonder, voorsitter van die Davel-boerevereniging, het gesê hy het toevallig gister verneem van die maatskappy Umbono se planne om aardgas in die gebied tussen Davel, Morgenzon, Bethal en Ermelo te ontgin.
Clive Machingaifa, woordvoerder van Umbono, het hul planne bevestig. 27 plase in dié streek is vir die prospektering van aardgas uitgesonder. As dit blyk daar is genoeg gas, sal hulle dit deur middel van hidrobreking van die steenkoollae aftrek.
As die Petroleum-agentskap van Suid-Afrika (Pasa) mynregte aan die maatskappy toestaan, sal dit as die Umbono Ermelo-Wesprojek bekend staan. Volgens Machingaifa doen Umbono nou aansoek om prospekteerregte. “Ons begin in die eerste week van November met die openbare-deelnameproses. Boere is reeds daarvan in kennis gestel.”
Van Tonder het gesê dit is bekend dat dié deel van Mpumalanga groot steenkoolneerslae met kragtige metaangas het. Volgens hom lê die steenkool te diep vir oopgroefmyne en is die metaangas so kragtig dat ondergrondse myne te gevaarlik is.
“Dit is die belangrikste rede waarom daar feitlik geen steenkoolmyne in die gebied is nie.”
Van Tonder het gesê die boere is baie onkundig oor hidrobreking, maar gaan sorg dat hulle nie onkant betrap word nie. Hulle hou daarom Maandag ’n noodvergadering in Davel om hulle van hul wetlike regte te vergewis.
– Volg Nuus24 op Twitter.
- Beeld