Hawking: God het nie heelal geskep
2010-09-02 14:38
Londen – God het nie die heelal geskep nie en die oerknal (big bang) was 'n logiese gevolg van die wette van fisika.
Só stry die bekende Britse wetenskaplike, Stephen Hawking (68), in ‘n nuwe boek, The Grand Design, waarvan uittreksels Donderdag gepubliseer is.
Hawking het die boek saam met ‘n Amerikaanse fisikus, Leonard Mlodinow, geskryf.
In dié boek sê Hawkings ‘n nuwe reeks teorieë toon dat 'n skepper van die heelal oorbodig is.
“Omdat daar ‘n wet soos gravitasie is kan en sal die heelal homself maak uit niks.
"Spontane skepping is die rede hoekom daar iets is en nie niks is nie, dit is die rede hoekom die heelal en ons bestaan,” het Hawkings gesê.
Hy het ook gesê dit "is nie nodig om God op te roep om die heelal aan die gang te kry nie."
Dié bekroonde kosmoloog en skrywer van die blitsverkoper A brief history of time, wat verskeie teorieë ontwikkel het om swart kolke en ander verskynsels in die hemelruim beter te verstaan, het sy vermoë om te kan praat in 1985 ná ’n lugpypinsnyding verloor.
Hy moes dié operasie weens ernstige longontsteking kry.
Hy het daarna met die hulp van ’n rekenaarbeheerde stemnabootser geleer praat.
The Grand Design behoort binne die volgende maand in winkels beskikbaar te wees.
Hoe voel jy oor dié onderwerp? Glo jy wetenskap het God as verduideliking oorbodig gemaak, of is Hawking se verduideliking nie bevredigend nie? Teken in en gesels saam in die kommentaar hieronder.
Volg Nuus24 op Twitter.