Hawking met gesogte wetenskapprys vereer

2012-12-12 16:19

Londen –  Die wêreldbekende Britse wetenskaplike Stephen Hawking (70) het gesê hy gaan dalk 'n vakansiehuis koop nadat hy £1,8miljoen (sowat R25 miljoen) ontvang het vir sy lewenslange bydrae tot teoretiese fisika, berig Daily Mail.

Hawking, tans direkteur van navorsing by die Universiteit van Cambridge se sentrum vir teoretiese kosmologie, is een van die nuutste wenners van die mees gesogte wetenskapprys.

Die Fundamentele prys vir Fisika is aan Hawking toegeken vir sy ontdekking dat swartkolke bestraling uitstraal en sy "diep bydrae" tot kwantum swaartekrag en kwantum aspekte van die vroeë heelal.

Hawking het in 'n e-pos gesê hy voel "verheug en geëerd" om die prysgeld te ontvang.

"Niemand doen navorsing in fisika met die oog daarop om 'n prys te wen nie. Dit is die vreugde om iets te ontdek wat niemand nog ooit geweet het nie.

"Pryse soos die speel egter 'n belangrike rol om openbare erkenning te gee vir prestasie in fisika."

Hy het verder gesê hy weet nie hoe hy die geld gaan spandeer nie, maar het gesê van die geld sal aan sy dogter gegee word vir hulp met haar outistiese seun en die res sal hy spandeer op 'n vakansiehuis.



– Lees meer hier

– Volg Nuus24 op Twitter