Hart eis een van dieretuin se oudstes
2012-01-30 08:00
Pretoria – Die Nasionale Dieretuin in Pretoria is een van sy oudste inwoners kwyt.
Jenny, ’n 55-jarige sjimpansee en een van dié dieretuin se eerste inwoners, is Vrydagoggend vroeg aan hartversaking dood.
Sy het in 1975 haar plek by die dieretuin ingeneem toe sy van die dieretuin in Soest, Duitsland, ingevoer is.
Craig Allenby, bemarkingsbestuurder, het gesê Jenny het in die laaste maand voor haar dood behandeling gekry vir haar hart.
Volgens Carin Cloete, kurator van primate in dié dieretuin, was Jenny ’n wonderlike dier en sal sy vreeslik gemis word.
“Jenny het altyd haar hande geklap wanneer sy gelukkig was. Sy het ook stukkies gras en materiaal vir dieretuinpersoneel aangedra as klein geskenkies,” het Cloete gesê.
“Ek sal altyd onthou hoe Jenny al die sjimpansees se kosbakke bymekaar gemaak en dít na die dieretuinpersoneel gebring het. Sy het soms ook gehelp om dié bakke te was.”
Cloete het gesê Jenny was ook baie lief daarvoor om snags in haar naghok na die radio te luister. “Sy het op die maat van haar gunstelingliedjies ook haar hande geklap.”
Allenby het gesê besoekers aan die dieretuin was gaande oor Jenny.
Bewaringspersoneel by die dieretuin hou nou ’n wakende oog oor Jenny se maat, Jasper (35), ’n sjimpansee-mannetjie, om sy welstand te verseker.
“Hy (Jasper) kry nou so tikkie ekstra liefde van sy oppassers, met wie hy ’n baie noue band het,” het Allenby gesê.
Jenny en Jasper het twee kinders, Caroline en Boris, saam gehad.
Die dieretuin sal binnekort vir Jasper na ’n ander maat begin soek.
– Volg Nuus24 op Twitter
- Beeld