Hare waai oor naam op Google-kaart

2012-05-07 09:34

(Google Maps)

New York – Owerhede in Iran is ontstoke oor 'n bekende watermassa in dié land wat op Google se kaartdiens, Google Maps, sonder naam is, het die tegnologiewebwerf Mashable berig.

Die land se regeerders is woedend omdat Google Maps nie die watermassa wat die res van die wêreld as die Arabiese Golf ken, en in Iran as die Persiese Golf bekendstaan, op hul kaarte aandui nie.

'n Senior Irannese amptenaar het Google Saterdag in 'n verklaring skerp gekritiseer, en gedreig dat die maatskappy die risiko loop om sy geloofwaardigheid in die Midde-Ooste te verloor.

“Google wat leuens opmaak… sal niks bereik nie, maar sy gebruikers sal vertroue verloor in die data wat die maatskappy verskaf,” het Bahman Dorri, adjunk-minister van kultuur en Islamitiese leiding volgens nuusberigte in Iran gesê.

Die BBC het verlede week berig dat ongelukkigheid oor die weglating groot ontevredenheid in die land veroorsaak het. Die watermassa is tot 'n paar dae gelede nog as die Persiese Golf aangedui.

'n Woordvoerder van Google het aan die BBC gesê Google Maps het nie 'n plekaanduiding vir elke plek in die wêreld nie.

Die Persiese Golf skei Iran van Arabiese lande suid van hom. Dié lande verwys die laaste paar jaar na dié watermassa as die Arabiese Golf.

– Lees hier meer.

– Volg Nuus24 op Twitter.