HTC verloor groot saak teen Apple

2011-10-18 12:36

Londen – Die Taiwanse slimfoonvervaardiger HTC het ‘n reuse-regsaak oor patenteregte teen Apple verloor en sy aandeelprys het daarna geval.

Die Amerikaanse Internasionale Handelskommissie het bevind Apple het nie aanspraak op HTC se patentregte gemaak nie.

HTC het die hof gevra om invoere van Apple se produkte na Amerika stop te sit oor dié beweerde oortredings.

Die Taiwanse maatskappy se aandeelprys het kort na dié beslissing met 6% geval.

Die saak het gehandel oor patente wat verband hou met inligtingsekerheid, die stoor van kontakbesonderhede en die funksionering van die foon se kragbron.

“Ons is seker ons het ‘n sterk saak wat ons voor die appèlhof sal bewys en ons is ten volle voorbereid om ons intellektuele eiendom te beskerm,” het Grace Lei van HTC gesê.

“Ons wil die probleem oplos sodat ons kan aanhou met die vooruitgang wat gebruikers die beste draagbare tegnologie sal bring.”

– Lees meer hier.

– Volg Nuus24 op Twitter.