Grootste soutwaterkrokodil vrek

2013-02-11 11:56

Manila – Die wêreld se grootste soutwaterkrokodil wat in aanhouding was, het in Bunawan in die suide van die Filippyne gevrek.

Die reptiel is vir verskeie aanvalle blameer voor dit in 2011 gevang is. Die dier is daarna in ‘n eko-toerisme park aangehou wat spesiaal daarvoor gebou is.

‘n Veearts het Sondag bevestig dat die krokodil gevrek het, het Edwin Cox Elorde, burgermeester van Bunawan, gesê. Die dier was glo meer as 50 jaar oud en het meer as een ton geweeg.

Amptenare moet nog die oorsaak van die reptiel se dood vasstel.

Guinness World Records het verlede jaar aangekondig dat dit die grootste soutwaterkrokodil in aanhouding is. Die krokodil was 6,17 m lank.

Die krokodil se versorger en verskeie inwoners van Bunawan was glo in trane.

“Ek is regtig depressief,” het Elorde aan AP gesê.

“Ek was lief vir daardie krokodil. Dit het roem na ons klein dorpie gebring.”

Die krokodil se karkas sal glo vir 'n tyd lank bewaar word sodat inwoners van hom kan afskeid neem.

– Volg Nuus24 op Twitter
 

- Sapa - AP