Groot ysberg begin opbreek naby Australië
2009-12-19 05:44
Sapa-dpa
Sydney – ’n Ysberg wat na raming twee keer so groot as die Sydney-hawe is en in die rigting van Australië se suidweskus dryf, het begin opbreek, is gister hier berig.
Die ysberg, bekend as B17B, was 19 km by 8 km groot toe dit die eerste keer 1 700 km van die kus deur ’n satelliet waargeneem is. Dit sal na verwagting heeltemal opbreek.
Volgens wetenskaplikes was die ysberg eens drie keer sy huidige grootte toe dit in 2000 van die Ross-yslaag in Antarktika losgebreek het.
Mnr. Neal Young, ’n gletserkundige van Australië, het aan die uitsaaier ABC gesê B17B is een van die grootste ysberge tot nog toe wat so ver noord gedryf het. Hy het voorspel die ysberg sal verder opbreek.
Skepe is verlede week gewaarsku om op die uitkyk te wees vir ysberge wat van B17B losgebreek het.
- Die Burger