Gratis keisersnee vir Britse vroue
2011-11-04 13:41
Londen – Swanger vroue in Brittanje, waar die regering gratis mediese sorg bied, kan binnekort ‘n keisersnee op aanvraag kry danksy nuwe mediese riglyne in dié land.
Kritici reken dit is bloot omdat owerhede toegee aan die giere van mense wat weier om natuurlik geboorte te gee.
Tot op hede kon vroue wat nie private dokters kon betaal nie slegs vir 'n keisersnee vra as daar gesondheidsrisiko’s vir die ma en baba was. Nood-keisersnee is slegs gedoen as die omstandighede dit genoodsaak het.
Nuwe riglyne wat later die maand in werking tree, sal swanger vroue egter “sonder enige rede” toelaat om ‘n keisersnee te hê.
“Dit is hoog tyd dat vroue... kan kies hoe hulle geboorte wil gee,” het Pauline Hull, wat twee keer weens mediese redes keisersnee gehad het, gesê.
“Die belangrike ding vir my was om my baba te ontmoet, nie die ondervinding van kraam nie.”
Hull reken dokters oordryf die risiko’s van keisersnee en onderskat die risiko’s van normale geboortes.
Die nuwe reëls is deur die Nasionale Instituut vir Gesondheid en Kliniese Uitnemendheid bekendgestel.
“Oor die algemeen is die keisersnee ‘n veilige operasie, veral as dit as deel van ‘n beplande prosedure uitgevoer word,” lui die nuwe riglyne.
– Volg Nuus24 op Twitter.
- Sapa - AP