Goudvissies in dié bakke dalk gou taboe
2012-02-04 07:15
Kaapstad. – Is jy ’n aanhanger van die ronde, deursigtige visbak met ’n klein goudvissie daarin?
As die nasionale raad van dierebeskermingsverenigings (NRDB) sy sin kry, sal dié klein vreugde jou dalk nie meer lank beskore wees nie.
“Dit is (tans) nie teen die wet nie, maar ons is daarteen gekant,” het Andries Venter, ’n senior NRDB-inspekteur, gesê.
Die NRDB het ’n petisie op sy webblad begin om mense te verbied om visse in klein, ronde visbakke aan te hou. Die vernaamste redes wat hulle vir dié stap aanvoer, is dat sulke visbakke nie genoeg lug toelaat nie.
“Ons hoop om einde vanjaar ’n beleid aan die minister (van omgewingsake) voor te lê sodat dit verbied of gereguleer kan word.”
– Volg Nuus24 op Twitter
- Die Burger