Google wil SA man hof toe sleep
2012-11-14 07:10
Johannesburg – Die internetreus Google dreig om ’n jong entrepreneur van Middelburg, Mpumalanga, te dagvaar omdat sy webwerf se naam te veel soos hulle s’n klink, berig Beeld.
Andries Maree (22) is die skepper van Doogle.co.za, waar werksoekers hul besonderhede gratis kan oplaai. Eiendomsadvertensies kan ook gratis geplaas word.
Hy het op 23 Oktober 'n aanmaningsbrief van Google se regsverteenwoordigers ontvang, omdat die soortgelyke name mense kan laat dink dat daar ’n samewerkingsooreenkoms tussen die twee webwerwe is. Volgens die regsverteenwoordigers is die logo's te soortgelyk.
Volgens Maree het hy baie name oorweeg, maar die ander domeinname wat hy wou probeer, was reeds geregistreer. Net Doogle was nog beskikbaar.
“Alles gebeur met ’n doel. Ek gaan nie skrik vir ’n groot maatskappy nie,” sê Maree.
“Dit (Doogle) is die enigste ding wat ek het. Dit vat baie werk en baie ure.”
Emmie de Kock, Maree se regsverteenwoordiger, het gesê hulle stem nie saam met Google nie en besluit saam met Maree oor hoe om voort te gaan.
– Volg Nuus24 op Twitter
