Google takel Apple in sleutelmark

2012-09-25 09:44

Tokio – Google het Dinsdag bekendgemaak dat hy sy Nexus 7-tabletrekenaar in Japan sal bekendstel, waar hy hoop om Apple die stryd aan te sê en markaandeel by die gewilde iPad te steel.

Die Nexus 7 se 16-gigagreep-model, wat deur die jongste weergawe van Google se Android-sagteware aangedryf word, sal van Dinsdag af aanlyn beskikbaar wees, en sal teen 2 Oktober op die land se winkelrakke wees.

Teen $255 (sowat R1 860) kos dit min of meer die helfte van Apple se goedkoopste iPad.

Eric Schmidt, uitvoerende voorsitter van Google, het by 'n hotel in Tokio gesê die Android-bedryfstelsel sal die Nexus help om 'n voet in die deur te kry in Japan.

"Android het so vinnig gegroei dis moeilik om by te hou," het hy gesê. "Daar is nou meer as 500 miljoen Android-gebruikers oor die wêreld heen."

Ongeveer 75% van Japannese verbruikers gebruik reeds toestelle wat deur Android aangedryf word vir aanlyn-inkopies, het Schmidt bygevoeg.

– Volg Nuus24 op Twitter.

- SAPA