Google moet opdok oor 'laster'
2012-11-12 09:18
Sydney – Die internetreus Google is beveel om Aus $200 000 (sowat R1,8 miljoen) in skadevergoeding te betaal aan 'n Australiese man ná 'n jurie bevind het dat die maatskappy hom aan laster skuldig gemaak het deur materiaal te publiseer wat die man aan misdaadbendes koppel.
Milorad Trkulja, 'n 62-jarige vermaakpromotor, is in 2004 in die rug geskiet in 'n misdaad wat nooit opgelos is nie.
Hy beweer Google het materiaal gepubliseer wat geïmpliseer het dat hy 'n bekende in misdaadkringe is, en dat hy deur 'n professionele sluipmoordenaar geteiken is.
Soektogte vir sy naam bring verwysings op na onder andere die bendebaas Tony Mokbel en 'n webwerf getiteld Melbourne Crime, wat bendeverwante inhoud bevat.
Google het in die hooggeregshof in Victoria ontken dat hy enigiets gepubliseer het, en het aangevoer dat materiaal wat deur ander mense gepubliseer is, bloot versprei is.
'n Jurie het egter ten gunste van Trkulja besluit, en gesê Google was bewus van die probleem, maar het versuim om op te tree.
'n Mediaregskenner van Bond Universiteit, Mark Pearson, het gesê dié saak is baie belangrik, omdat dit ernstige gevolge vir maatskappye soos Google kan inhou.
"Wat die hof hier gesê het is dat hierdie nie net onskuldige [program]argitektuur is nie, maar dat dit sagteware is wat deur mense geskep is om inligting op 'n spesifieke manier te vertoon," het Pearson gesê.
– Volg Nuus24 op Twitter.
- AFP
