Google-krabbel vereer wiskundige
2011-08-17 11:22
Kaapstad – Die tegnologies gevorderde slimkoppe by Google eer vandag een van die wiskunde se grootste breine met hul beskeie jongste krabbel – ‘n minder interaktiewe, primitiewe swartbord.
Die soekreus se naam pronk in bordkryt half afgevee in die Franse wiskundige Pierre de Fermat se bekende vergelyking.
“Ek het ‘n merkwaardige vergelyking ontdek, maar hierdie kantlyn is veels te klein om dit in te perk,” het hy in die kantlyn van sy handboek Arithmetica, deur Diophantus van Alexandria, in 1637 geskryf.
Só belangrik is dié prokureur en amateurwiskundige se werk dat moderne slimkoppe by Google die krabbel veels eenvoudiger as hul vorige pogings gehou het – sonder enige beweging of interaktiewe geraas.
As die gebruiker die muis oor die krabbel hou, verklaar die alternatiewe teks beskeie “ek het ‘n merkwaardige vergelyking ontdek, maar hierdie krabbel is veels te klein om dit in te perk.”
Fermat is op 16 Augustus 1601 in Beaumont-de-Lomagne, Frankryk gebore.
– Volg Nuus24 op Twitter.
- Nuus24