Google dalk klaar met China
2010-01-13 10:59
San Francisco/Washington – Google, die wêreld se grootste soekenjin, het Dinsdag gedreig om sy Chinese webtuiste, google.cn, sowel as kantore in China toe te maak ná gesofistikeerde kuberaanvalle op menseregte-aktiviste uitgevoer is deur Google se e-posdiens, Gmail, te gebruik.
Dié besluit mag verdere spanning tussen China en die VSA tot gevolg hê, terwyl Washington gereed maak om wêreldwyd sensuur op die internet te beëindig.
Hillary Clinton, die Amerikaanse minister van buitelandse sake, het aangedring op ‘n verduideliking deur Beijing aangaande dié kuberaanvalle, wat volgens haar “ernstige kommer en vrae” wek.
Terwyl die nuus oor Google se moontlike onttrekking soos ‘n veldbrand onder Chinese internet-gebruikers versprei, bly die regering en staatsmedia doodstil oor dié bewerings.
Spanning oor die internet
Die Amerikaanse president, Barack Obama, het tydens ‘n besoek aan China in November verlede jaar gesê hy ondersteun nie sensuur nie.
“Die feit dat (Amerika) gratis, of onbeperkte toegang, tot die internet het, is ‘n bron van krag. Ek dink dit moet aangemoedig word,” het hy gesê.
Google aangeval
“Die kuberaanval, sowel as pogings gedurende die afgelope jaar om vryheid van spraak op die web te beperk, het ons gedwing om die uitvoerbaarheid van operasies in China te hersien,” het David Drummond, Google se hoof-regsbeampte, in ‘n verklaring op dié maatskappy se blog gesê.
‘n Woordvoerder vir Google het gesê die maatskappy is nog besig om die kuberaanval te ondersoek en wou nie sê of Google meen dat Chinese owerhede by die saak betrokke is nie.
- Reuters