Goedhartigheid in jou gene
2011-11-16 13:12
New York – Navorsers meen mense met ‘n sekere geen is meer goedhartig as mense daarsonder, en vreemdelinge kan vinnig die verskil uitken.
Die variasie hou verband met die liggaam se reseptorgeen van oksitosien.
Oksitosien is bekend as die “liefdeshormoon” omdat die hormoon tydens seks afgeskei word en empatie en barmhartigheid tussen mense aanmoedig.
Navorsers van die Oregan State-universiteit in Amerika het met ‘n eksperiment vorendag gekom waarin 23 paartjies, wie se genotipes aan navorsers bekend was, in gesprek verfilm was.
Een lid van die paartjie moes die ander ‘n hartseer storie uit hul verlede vertel terwyl vrywilligers die gesprek sonder klank waargeneem het.
In die meeste gevalle kon die vrywilligers uitken wie die “goedhartigheidsgeen” gehad het, het die navorsers in die Proceedings of the National Academy of Sciences geskryf.
“Ons bevindinge bewys selfs ‘n klein genetiese variasie kan ‘n groot impak op mense se gedrag hê en ander mense kan hierdie verskille maklik uitken,” het die hoofnavorser, Aleksandr Kogan, van die Universiteit van Toronto in Kanada gesê.
– Volg Nuus24 op Twitter.
- AFP