Glas in vrugte se verpakkingsmateriaal

2012-03-15 14:00

Johannesburg – ’n Kennisgewing is uitgestuur oor die moontlike voorkoms van stukkies glas in verpakkingsmateriaal vir vrugte, sê die landboukonsultasiefirma Hortgro.

Luidens ’n verklaring het Huhtamaki SA (Edms.) Bpk. sy plaaslike kliënte in kennis gestel dat hul verpakkingsmateriaal vir vrugte moontlik stukkies glas in kan hê, het Landbou.com berig.

Die houers word gemaak van ’n pulp van herwinde papier. Dit word gebruik om vrugte in houers te verpak om na markte vervoer te word.

Hortgro sê volgens Huhtamaki is die waarskuwing van toepassing op produkte wat van 12 September 2011 tot 7 Maart 2012 gelewer is.

Hortgro het hierop gereageer deur die versekering te gee dat alle pakhuise oor dié verwikkeling ingelig is sodat moontlik besmette produkte onmiddellik verwyder kan word.

Huhtamaki het ook bevestig dat hulle stappe gedoen het om te reël dat alle moontlik besmette voorraad apart van ander voorraad gehou word tot dit fisiek deur Huhtamaki verwyder word.

Lees meer hier

Volg Nuus24 op Twitter

- Landbouweekblad