Geveg oor hidrobreking kan in hof draai

2012-09-10 13:05

Kaapstad - Die stryd oor die ontginning van skaliegas in die Karoo is nog lank nie verby nie, het drukgroepe gesê wat gereed maak vir 'n stryd wat in die grondwethof kan draai.

Susan Shabangu, minister van minerale hulpbronne, sal Dinsdag by die parlement die media toespreek oor die tegniese taakspan se verslag wat die kabinet verlede week goedgekeur het toe ‘n moratorium op hidrobreking verlede week opgehef is.

Die besluit het omgewingsgesindes en drukgroepe wat gekant is teen die omstrede stelsel van hidrobreking warm onder die kraag gelaat, berig die Cape Times.

Shabangu se kantoor sê sy sal besonderhede gee oor die regering se “standpunt en plan vorentoe rakende die kwessie” voor ‘n sitting van die nasionale vergadering Dinsdagmiddag waar die kwessie bespreek sal word.

“Ons gaan definitief hof toe. Ons het onsself al 18 maande lank daarop voorberei. Ons glo verskeie wette is oortree,” het Jonathan Deal van die Treasure the Karoo-aksiegroep gesê.

“Dit is nog net die begin van die geveg.”

– Lees meer hier.

– Volg Nuus24 op Twitter