Gerehabiliteerde pikkewyne kies flink koers see toe
2011-10-11 09:13
Simonstad. – Party was effens verdwaald en ander het in die bokse probeer terugklim, maar die meeste het saamgebondel en reguit see toe laat spaander.
’n Groep van 27 brilpikkewyne wat deur die Suider-Afrikaanse Stigting vir die Beskerming van Kusvoëls (Sankub) gerehabiliteer is, is Saterdag by Boulders-strand, Simonstad, vrygelaat.
“Die voëls is heeltemal wild en pas baie gou weer in die natuur aan,” het Venessa Strauss, uitvoerende hoof van Sankub, gesê.
“Daar is baie navorsing wat wys hoe suksesvol die rehabilitasie is.”
’n Groep mense en kinders het Saterdag in groot afwagting saamgedrom om te sien hoe die voëls vrygelaat word.
Dit was Saterdag ook Nasionale Brilpikkewyndag, wat spesiaal gehou word om mense bewus te maak van die faktore wat dié pikkewyne se voortbestaan bedreig.
Ouers en kinders het luid hande geklap toe die bokse oopgemaak is en die pikkewyne koers gekies het see toe.
Die meeste van hulle is van Bettysbaai, Robbeneiland, Kaap Agulhas, Dyer-eiland en Boulders-strand.
Volgens Strauss is van die pikkewyne ouerloos gelaat, ander is beseer en sommige is met olie besoedel.
Drie van die kuikens is ook besoedel by Tableview-strand met olie wat uit die Turkse vragskip Seli 1 gelek het.
– Volg Nuus24 op Twitter.
- Volksblad