Geen selfone vir vroue in Indiese dorpie
2012-12-05 09:50
Patna – Aktiviste het protes aangeteken ná 'n dorpsraad in die oostelike Indiese staat Bihar 'n besluit geneem het om die gebruik van selfone deur vroue te verbied.
Die raad het onder andere gesê die toestelle "vernietig die sosiale atmosfeer" in die dorp, omdat dit vroue inspireer om weg te loop om te trou.
Owerhede in Sunderbari, 'n dorpie in 'n Moslem-gebied sowat 385 km oos van Patna, die hoofstad van Bihar, het besluit om vroue met sowat R1 500 te beboet as hulle in die openbaar met 'n selfoon betrap word.
Getroude vroue hoef net ongeveer R320 op te dok.
"Dit veroorsaak altyd 'n groot verleentheid as iemand vra wie het nóú weer weggeloop om te trou," het Manuwar Alam, wat aan die stuur staan van die komitee wat die wet moet toepas, gesê.
Die aantal affairs en weglooptroues in die dorpie het glo die afgelope paar maande baie toegeneem.
"Selfs getroude vroue loop saam met hulle minnaars weg. Dis vir ons 'n skande," het Alam gesê.
"So, ons het besluit om die probleem op 'n ferm wyse te takel. Selfone vernietig die sosiale atmosfeer".
– Volg Nuus24 op Twitter.
- Reuters
