Geen porno op sel, internet
2010-06-06 14:06
Pretoria - Suid-Afrikaanse volwassenes kan eersdaags sukkel om pornografie in die hande te kry.
Die
regering is vasbeslote om die voorbeeld van China, die Verenigde
Arabiese Emirate en Jemen te volg deur álle pornografie op die internet
en selfone te verbied.
Mnr. Malusi Gigaba, adjunkminister van
binnelandse sake, het die Suid-Afrikaanse Regshervormingskommissie (SAR)
gevra om die kwessie na te vors en het nou ’n stap verder gegaan deur
reeds ’n wetsontwerp op die tafel te plaas.
Die Wetsontwerp op
Pornografie op die Internet en Selfone, wat saamgestel is deur die
Justice Alliance of South Africa (Jasa), se doel is om “vroue en
kinders” teen pornografie te beskerm.
Sommige regskenners en
kampvegters vir vryheid van spraak se oë het egter behoorlik gerek oor
die jongste verwikkeling. Hulle sê dit raak ’n gevaarlike situasie
wanneer die regering landsburgers begin voorskryf watter inligting hulle
op die internet mag bekom en watter nie.
’n Algehele verbod, wat
deur internetdiensverskaffers toegepas sal moet word, is die enigste
manier om te verseker dat kinders nie aan pornografie blootgestel word
nie, sê adv. John Smyth QC, direkteur van Jasa.
Jasa, ’n
alliansie van regslui en onder meer kerkgroepe, meen verder die
wetsontwerp is nie ongrondwetlik nie, aangesien kinders se belange
swaarder weeg as ander grondwetlike regte.
Maar sommige kenners
in die media- en IT-reg verskil hiervan.
Mnr. William Bird,
direkteur van die Media Monitoring Project, sê die regering het nie die
kapasiteit en hulpbronne om internetverkeer te reguleer en sensureer
nie.
“China bestee miljarde om te reguleer wat landsburgers mag
sien en húlle is nie eens suksesvol nie.”
Pornografie was een van
die hoofredes vir die ontsaglike groei van die wêreldwye web en was in
’n stadium verantwoordelik vir sowat 80% van internetverkeer.
Bird
sê die wetsontwerp neem ouers se verantwoordelikheid weg om hul kinders
behoorlik in te lig oor blootstelling aan pornografie, asook die
verantwoordelikheid om hulle in die algemeen daarteen te beskerm.
“Niemand
sê kinders moet aan pornografie blootgestel word nie, maar pornografie
vir volwassenes is nie noodwendig ’n slegte ding nie.”
Daar is
reeds verskeie wette teen kinderpornografie en wette om die vertoning
van pornografie aan kinders hok te slaan. Daar is ook sagteware wat
ouers in staat stel om toegang tot sekere webtuistes te keer.
Maar
Gigaba en Jasa meen die wetsontwerp is die “enigste” doeltreffende
maatreël.
“Motors kom met remme en veiligheidsgordels, dit is nie
’n ekstra waarvoor gebruikers moet betaal nie. Daar is geen rede waarom
die internet nie toegerus moet word met die nodige beperkende
meganismes nie,” sê Gigaba.
Me. Portia Mngomezulu, ’n kenner van
die Webber Wentzel-regsfirma, sê die wetsontwerp plaas te veel
verantwoordelikheid op diensverskaffers in die IT-bedryf. Hulle sal die
koste moet dra om elke webwerf of stukkie inhoud op selfone te monitor
en te filter.
“Die meeste diensverskaffers dien slegs as ’n
kanaal en monitor glad nie die inhoud van inligting nie. Die wetsontwerp
gaan net te ver.”
- Rapport