Geelsug dalk faktor by outisme - studie
2010-10-11 13:46
Washington - Babas wat gebore word met geelsug loop 'n veel groter risiko om outisme te ontwikkel, toon die uitslag van 'n nuwe studie.
Dié studie, wat van 1994 tot 2004 in Denemarke gedoen is, en gepubliseer is in die Amerikaanse joernaal Pediatrics, het bevind dat babas wat met geelsug gebore is, 'n 67% groter kans het om aan outisme te ly.
Neonatale geelsug word gewoonlik veroorsaak deur 'n oormaat galkleurstof in die bloed.
Sestig persent van voltermyn-babas word gebore met geelsug, maar dit verdwyn gewoonlik in die eerste week ná geboorte.
Volgens die studie is die risiko van outisme hoër as die ma reeds ander kinders het, of, vreemd genoeg, as die kind tussen Oktober en Maart gebore is.
Die risiko van outisme verminder by eersgeborenes, of as die kind gebore is tussen April en September.
Navorsers voer aan dat die seisoenale verskil moontlik toegeskryf kan word aan die verskil in blootstelling aan daglig, wat weer 'n invloed het op geelsug.
Volg Nuus24 op Twitter.
- SAPA