'Gangnam Style' tweede gewildste ooit op YouTube
2012-11-02 13:57
Seoel – Die Suid-Koreaanse popkunstenaar Psy se “Gangnam Style” is reeds sowat 620 miljoen keer op YouTube gekyk, en is nou die video wat die tweede meeste ooit op dié webwerf gekyk is.
Die 34-jarige sanger, wie se regte naam Park Jae-Sang is, het internasionale roem verwerf nadat "Gangnam Style" in Julie ná sy debuut 'n wêreldwye treffer geword het.
Die video het Vrydag die sangeres Jennifer Lopez se danstreffer "On the Floor" uitgestof vir die tweede plek, maar speel steeds tweede viool teen Justin Bieber se "Baby," wat 790 miljoen keer gekyk is.
Psy is ook vir 'n sesde agtereenvolgende week in die tweede plek op die Billboard Hot 100 in die Verenigde State nadat hy trefferlyste in ondermeer Brittanje en Australië gehaal het.
Die gewildheid van die liedjie en video het vir die sanger 'n kontrak losgeslaan by Bieber se bestuuragentskap.
Psy, wat tans besig is met 'n promosietoer in die Verenigde State, het verlede week op ABC se The View opgetree.
Die ster is 'n musiekveteraan in sy tuisland en spog met ses albums. Hy sal volgende week 'n promosietoer in Europa begin, wat 'n toespraak by die Oxford Union en 'n verskyning by die MTV Europe-musiektoekennings in Duitsland insluit.
– Volg Nuus24 op Twitter
- AFP
