Fotograwe dagvaar Google
2010-04-09 10:22
Kaapstad - Google Books word deur professionele fotograwe en kunstenaars gedagvaar vir die verontagsaming van kopiereg, berig Mashable.com.
“Google skandeer miljoene boeke en ander publikasies sonder om die kopiereg van foto’s en prente in dié boeke, in ag te neem nie,” het die American Society of Media Photographers (ASMP) in ‘n verklaring gesê.
Google Books is onlangs deur verskeie outeurs en uitgewers gedagvaar omdat hulle boeke verniet op hul webblad beskikbaar maak.
Op die ou end is daar ooreengekom dat gedeeltes van dié boeke beskikbaar kan wees op die internet, maar slegs as die boek nie meer gepubliseer word nie.
Visuele kunstenaars is egter nie tydens die skikking in ag geneem nie.
Die eisers in die nuwe hofsaak, sê dit is nie nét Google Books wat gaan deurloop nie.
“Die hofsaak strek verder as net die Google Library Project,” het die ASMP in hul verklaring gesê.
“Daar is ander funksies op Google wat die regte van visuele kunstenaars ignoreer.”
Dis heel waarskynlik dat dié groep visuele kunstenaars na Google se gewilde Image Search funksie verwys.
Kliek hier vir die volledige storie.