Flitter op Twitter en raak verlief
2010-02-18 12:43
Toronto – Vir alle liefhebbers van tegnologie wat enkellopend is, maar sukkel om liefde te vind, te skaam is of net ‘n manier soek om nuwe mense te ontmoet, kan julle gerus bietjie Flitter op Twitter.
Honderde enkellopendes het verlede week Flitter-partytjies reg oor Kanada bygewoon om deel te neem aan die nuutste speletjie wat ‘n spel van woorde en flirtasie op die sosiale netwerk Twitter insluit.
Elke gas het ‘n wit plakker met ‘n nommer op gedra.
Elkeen het hulle iPhones en Blackberrys in ‘n half-beligte vetrek in Toronto met hul duime bewerk en op Twitter laat waai.
Hulle was besig om te Flitter en elkeen het probeer om die aandag van ander tweeters te vang wat saam met hulle Valentynsdag alleen deurgebring het.
"#129, jy is mooi, maar #152, jy is nie so mooi nie. Wat sal #72 doen?" het een gas getweet wat se kommentaar op die groot skerm in die vertrek verskyn het.
Will Lam, ‘n 27-jarige professionele bankier en ‘n Twitter-aanhanger het die geleentheid bygewoon, omdat hy wou sien hoe Flitter werk.
"Ek het net gewonder hoe hulle interaksie tussen mense sal fasiliteer,” het Lam gesê wat die tweeting ongemaklik en steurend gevind het in sy poging om ‘n gesprek met ‘n dame aan te knoop.
"Ek het #19 getweet dat sy regtig oulik is, maar ek kon haar nie weer kry nie,” het hy gesê.
Halley Trusler (23) wat onlangs na Toronto getrek het, beskou Flitter as ‘n wonderlike manier om nuwe mense te ontmoet.
"Dit gee mense wat baie skaam is die geleentheid om 'n kans te vat,” het sy gesê.
Trusler het baie tweets ontvang en talle het haar vir ‘n drankie genooi.
Alle deelnemers moet die einde van hulle tweet met die woord "Flitterme" afsluit.
Justin Parfitt, die stigter en die besturende direkteur van Fastlife, ‘n diens wat in Kanada gelewer word om mense te ontmoet, het die Flitter-geleenthede vir enkellopendes in Australië begin en dit pas aan Noord-Amerika bekendgestel.
Hy het geweet daar moet een of ander manier wees om met ander mense te kommunikeer deur om sake-georiënteerde instrumente soos Blackberrys en iPhones te gebruik.
Die Flitter-partytjies is op die internet geadverteer.
-Reuters