Farmaseutiese maatskappye 'buit siekes uit'
2011-11-17 08:42
Kaapstad – Suid-Afrikaners word ontneem van goedkoper generiese medikasie wat hul lewe kan red omdat verouderde wetgewing groot farmaseutiese maatskappye beskerm.
Dít was gister die boodskap van die Treatment Action Campaign (TAC) op ’n nuuskonferensie waar dié aksiegroep gesê het Suid-Afrika pas ook nie die reg toe ingevolge ’n deklarasie (die Trips-ooreenkoms) wat tienjaar gelede in Doha-onderteken is nie. Ingevolge dié ooreenkoms kan hy in belang van openbare gesondheid sekere patentregte opskort om goedkoper generiese medisyne te skep.
Mara Kardas-Nelson van Dokters Sonder Grense (DSG) het gesê dit beteken die regering kon, deur die patentwet te wysig, jare gelede al óf goedkoper generiese medisyne vir MIV/vigs, tuberkulose (TB) en kanker uit Indië of Brasilië ingevoer het óf dit self in Suid-Afrika laat vervaardig het.
Daar is tans geen middel in die staatsektor in Suid-Afrika beskikbaar vir middelweerstandige TB of ’n derde opsie vir mense wat weerstandig teen vigsmiddels geraak het nie, het Gilles van Cutsem van DSG gesê.Vir albei dié gevalle bestaan goedkoop generiese middels in Indië.
Catherine Tomlinson van die TAC het gesê maatskappye behoort hier, soos elders, gekeer te word om ’n patent van ’n bestaande middel – waarvan die formule net effens verander is of waarvan die vervaardiger dit wil laat herpatenteer – vir ’n ander doel te registreer. Dit lei daartoe dat ’n middel, wat basies dieselfde is, vir ’n verdere 20 jaar teen generiese ontwikkeling beskerm word.
Sy het gesê die land behoort ook nuwe patente te hersien, juis om dié rede, en ’n derde party behoort ’n kans te kry om dit teen te staan.
“Suid-Afrika het vigs- en TB-epidemies en die land het nog nooit iets gedoen om ’n verpligte patent uit te reik vir generiese medikasie nie. Daar is gebreke in die wet en die politieke wil ontbreek.”
– Volg Nuus24 op Twitter.
- Die Burger