Facebook vererger jaloesie
2009-08-09 21:52
New York - 'n Nuwe studie dui daarop dat Facebook 'n bydraende faktor kan wees tot jaloesie in verhoudings.
Dié studie, gepubliseer in die CyberPsychology & Behavior-joernaal, het die effek van die gebruik van Facebook op die romantiese verhoudings van 'n groep studente ondersoek.
Luidens die verslag is daar 'n “noemenswaardige verband tussen die hoeveelheid tyd wat op Facebook deurgebring word, en jaloesie-verwante gevoelens en optrede op Facebook.”
Die studie vorm deel van 'n navorsingsprojek oor die gebruik van Facebook deur studente.
Volgens die verslag het 19.1% van respondente meer jaloers opgetree ná hulle meer uitgevind het oor hulle maats se Facebook-interaksies met ander.
10.3% van respondente het dit moeilik gevind om die hoeveelheid tyd te verminder wat hulle spandeer om hul maats se Facebook-gebruik te monitor.
16.2% van respondente het aangedui dat daar 'n verband is tussen Facebook-gebruik en verhoogde gevoelens van jaloesie.