Facebook se bates tydelik gevries
2010-07-13 10:02
Washington - 'n Regter in New York het 'n tydelike interdik uitgereik wat die oordrag van Facebook se bates verbied ná 'n New Yorkse man beweer het hy besit 84% aandele in dié sosiale netwerk, het The Wall Street Journal berig.
Paul Ceglia beweer dat hy volgens 'n kontrak wat hy in 2003 met Mark Zuckerberg, stigter van Facebook, gesluit het, geregtig is op eienaarskap van die maatskappy en monitêre skade.
Regter Thomas Brown het vroeër vandeesmaand dié interdik uitgereik.
'n Woordvoerder van Facebook het gesê: "Ons glo dié eis is beuselagtig en ons sal dit heftig teenstaan".
Ceglia het in hofstukke beweer dat hy op 28 April 2003 'n kontrak met Zuckerberg onderteken het om 'n webwerf te ontwikkel en ontwerp vir 'n fooi van $1000 (sowat R7600) en 'n 50% aandeel in die produk.
Zuckerberg het Facebook ses jaar gelede begin toe hy 'n student aan die Harvard-universiteit was.
Volg Nuus24 op Twitter
- AFP